एकजना सम्मानित, एकजना पुरस्कृत

काभ्रे । शब्दयात्रा प्रकाशनले हिजो २०८० साल भदौ २ गते शनिबार एकजनालाई सम्मान र एकजनालाई पुरस्कार समर्पण गरेको छ ।
शिक्षार्थीहरूलाई आफ्नो विषयमा शिक्षा दिने क्रममा आत्मानुशासन, नैतिक चरित्र, कर्तव्यबोध, सामाजिक मर्यादा, मानवीय भावना र आध्यात्मिक चेतनाको पनि शिक्षा दिनुका साथै ती विषयमा शिक्षार्थीहरू थप सबल बनून् भन्ने ध्येयले विभिन्न पुस्तकहरूको लेखन–प्रकाशन समेत गर्नुभएकोमा ललितपुरकी प्रा. डा. वीणा पौड्याललाई २०८० सालको शब्दयात्रा अङ्गुरबाबा जोशी शिक्षक सम्मान समर्पण गरिएको हो । सम्मान गर्दा अभिवन्दनापत्र, किरीट, भेटी, उपहार र रुद्राक्षमाला समर्पण गरिएको थियो । यस सम्मानका कोष व्यवस्थापक धुलिखेलकी शिक्षासेवी निर्मलाकुमारी यगोल श्रेष्ठ हुनुहुन्छ ।
यसै गरी नेपाली राष्ट्रिय परिवेशको भावभूमिमा आञ्चलिकतालाई समेत आधार बनाई विचारशील र राष्ट्रप्रेमयुक्त कथा, उपन्यास र बालकथा विधाका साहित्यिक कृतिहरूको लेखन–प्रकाशन गरेर नेपाली समाजको सकारात्मक रूपान्तरणमा साहित्यका माध्यमबाट महत्त्वपूर्ण भूमिका निर्वाह गर्नुभएकोमा महोत्तरीका कथाकार श्री इस्माली अथवा महेश्वरप्रसाद उपाध्याय पौडेललाई २०८० सालको शब्दयात्रा बद्रीविक्रम थापा महोत्तरी प्रतिभा पुरस्कार समर्पण गरिएको हो । पुरस्कृत गर्दा अभिवन्दनापत्र, किरीट, भेटी, उपहार र रुद्राक्षमाला समर्पण गरिएको थियो । यस पुरस्कारको कोष व्यवस्थापक कर्मयोगी बद्रीविक्रम थापा स्मृति सेवागुठी रहेको छ ।
यी दुवै सम्मान र पुरस्कार हरेक वर्ष समर्पण गर्ने गरिएको छ । यी सम्मान र पुरस्कारबाट सम्मानित र पुरस्कृत हुनुभएकोमा दुवैलाई हार्दिक बधाई ज्ञापन गर्दै समारोहमा समुपस्थित सहभागीहरूका तर्फबाट सम्मानित तथा पुरस्कृत व्यक्तित्वहरूको कीर्तिपताका निरन्तर फैलिरहोस् भनी शब्दसाधक तीर्थ नीलकण्ठेश्वर धाममा विराजित सम्पूर्ण देवीदेवता र पितृहरूसँग प्रार्थना गरिएको छ ।
शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्व र नेपाल संस्कृत विश्वविद्यालयका पूर्वउपकुलपति प्रा. डा. कुलप्रसाद कोइरालाको प्रमुख आतिथ्य तथा प्रा. डा. नन्दीश अधिकारी र डा. रेखा यादवको आतिथ्यमा उक्त कार्यक्रम शब्दयात्रा प्रकाशनको सभाकक्षमा सम्पन्न भएको थियो ।